Ајакс и ПСВ одиграа дерби со висок ритам, многу директен фудбал и доволно шанси резултатот да биде и поинаков од конечните 1:3. Особено во првото полувреме, домаќините имаа периоди во кои изгледаа подобро, создадоа неколку големи можности и преку Арокодаре пронајдоа начин да ја нарушат поставеноста на противникот.
Раното водство на ПСВ не го промени пристапот на Ајакс. Напротив, израмнувањето дополнително го крена темпото, а во еден период се чинеше дека домаќините се многу поблиску до целосен пресврт отколку гостите до нов погодок. Брандт, Бергхаус и Класен имаа можности да ја променат насоката на дербито, но токму нивните промашувања подоцна се покажаа како скапи.
ПСВ, сепак, беше далеку поефикасен во моментите кои го одлучуваа натпреварот. Гостите поведоа по едноставна и брза акција, го преживеаја најдобриот период на Ајакс, а потоа во судиското продолжение од првиот дел повторно стигнаа до предност. Погодокот на Гертруида дојде во момент кога Ајакс веројатно најмалку го очекуваше и целосно ја промени почетната позиција за второто полувреме.
Во продолжението гледавме поинаков натпревар. Ајакс ја имаше топката, направи сериозни промени во офанзивниот дел и се обиде да го зголеми притисокот, но со текот на времето стануваше сè потешко да пронајде чист пат до голот. ПСВ, од друга страна, ја имаше поставеноста и дисциплината потребни да ја зачува предноста, а на крајот и да ја претвори во убедлива победа.
Арокодаре ги врзуваше стоперите, Ајакс го користеше просторот околу него
Иако ПСВ рано поведе преку Пепи, Ајакс не отстапи од својата идеја. Умерениот пресинг беше доволен гостите да не можат постојано мирно да ја организираат играта, додека со топка домаќините се обидуваа што почесто да го пронајдат Арокодаре во централните позиции.
Неговата улога беше многу поважна од самото присуство во шеснаесетникот. Со својата физичка сила ја задржуваше топката и го привлекуваше вниманието на Гертруда и Обиспо. Стоперскиот тандем на ПСВ генерално добро се справуваше со него, но фокусот кон централниот напаѓач отвораше простор за останатите.
Токму тука Ајакс најлесно создаваше опасност. Играчите од средниот ред се втурнуваа од втор план во просторот околу Арокодаре, без последната линија на ПСВ секогаш навреме да ги преземе. Шансата на Класен беше најдобар пример – капитенот ја препозна лошата поставеност и излезе сам пред Ковар, но не ја искористи можноста. Претходно огромна шанса имаа и Брандт и Бергхаус.
Истовремено, ПСВ имаше јасна предност по левата страна. Рубен Ван Бомел со својата експлозивност постојано му создаваше проблеми на Гаеи, а Перишиќ дополнително ја правеше таа страна опасна.
Гостите немаа потреба од долг посед за да создадат шанса. Првиот погодок го покажа тоа најдобро – само четири потези беа потребни топката да стигне до Пепи. А кога Ајакс не ги искористи своите можности, ПСВ казни повторно. По корнер во 45+1, Гертруда со одличен волеј погоди за 1:2 во најдобриот можен момент за гостите.
Замените требаше да го подобрат нападот, но ја нарушија играта на Ајакс
Негативата го принуди Ајакс да бара поголема офанзивна закана во второто полувреме. Следуваше речиси целосна промена на нападот – Циганков, Долберг и Маркос Леонардо добија шанса, додека Арокодаре, Бергхаус и претходно Глокх го завршија својот настап.
На хартија, Ајакс доби свежина и дополнителен индивидуален квалитет. На теренот, ефектот беше спротивен.
Со излегувањето на Арокодаре исчезна централната точка околу која претходно се движеа останатите играчи. Домаќините имаа повеќе офанзивци на теренот, но помалку јасна структура како да ги употребат.
ПСВ одлично го искористи тоа. Гостите играа дисциплинирана одбрана човек на човек, а физички беа подготвени да ги следат противничките играчи низ голем простор. Речиси секое примање меѓу линиите веднаш беше ставено под притисок.
Дури и Мокио, кој во првото полувреме беше еден од главните организатори, по промените се најде повисоко и постепено се изгуби во густата поставеност на ПСВ. Ајакс продолжи да има повеќе од топката, но поседот веќе не создаваше вистинска опасност. Организираните напади од првиот дел исчезнаа, а решението сè почесто се бараше преку долги топки.
ПСВ немаше проблем со таквиот развој. По секоја освоена топка првата идеја беше движење напред и напад на одбраната пред таа целосно да се постави.
Повеќе офанзивци, помалку решенија
Во периодот кога Ајакс требаше да оди на сè или ништо, домаќините практично останаа без вистински завршен притисок. Тензијата и долгиот прекин по жестокиот дуел на Ван Бомел дополнително го нарушија ритамот, но проблемите на Ајакс започнаа многу порано.
ПСВ успеа да го одземе она што во првиот дел функционираше најдобро кај домаќините. Со промените Ајакс доби нови играчи, но ја загуби структурата преку која претходно создаваше простор и шанси. Гостите, пак, останаа доследни на својот пристап – дисциплинирани без топка и максимално директни кога ќе ја освојат.
Третиот погодок на Бајрактаревич по загубена топка во средината беше само последната потврда на тоа.
Ајакс можеби ќе жали за неискористените шанси од првото полувреме, но ПСВ подобро го одигра натпреварот кога условите се променија. Во Амстердам не победи екипата која ја имаше иницијативата, туку онаа која подобро знаеше што да направи со просторот што ќе ѝ го остави противникот.